తిన్నావా లేదా.. అని అడిగానా ఎపుడైనా...

----భార్య విలువను తెలుసుకొన్న భర్త పాడే గజల్----


తిన్నావా లేదా.. అని అడిగానా ఎపుడైనా...
నడుం వాల్చలేదేమని..  అన్నానా ఎపుడైనా..


తిన్నావా లేదా.. అని అడిగానా ఎపుడైనా...


చీర నీకు బాగుందని.. పొగిడానే గానీ...
ఆ చీరకు నీవే సొగసని.. అన్నానా ఎపుడైనా..


తిన్నావా లేదా.. అని అడిగానా ఎపుడైనా...


జడలో మల్లెల వాసనా... పీల్చానే గానీ...
తన మనసులోని పరిమళాన్ని చూసానా ఎపుడైనా...


తిన్నావా లేదా.. అని అడిగానా ఎపుడైనా...


ముసురు వేళ వేడి వంట.. తిన్నానే గానీ...
నీ ప్రేమకింత రుచి ఉందని.. అన్నానా ఎపుడైనా..


తిన్నావా లేదా.. అని అడిగానా ఎపుడైనా...


బండ చాకిరి నీదనీ...భావించానే గానీ..
చెంపనంటిన చెమట తుడిచి.. ముద్దు పెట్టానా ఎపుడైనా..


తిన్నావా లేదా.. అని అడిగానా ఎపుడైనా...


అర్దాంగివి కావు నీవు... అనురాగాదేవతవు..
రసరాజై ఈ నిజాన్ని.. రాస్తానా ఎపుడైనా...


తిన్నావా లేదా.. అని అడిగానా ఎపుడైనా...


              ---రచన: రసరాజు           గానం: గజల్ శ్రీనివాస్